Fédération Departementale des Chasseurs de la Corse du Sud

A Bracunera



«A Bracunera »

(Le braconnage)

I ditti è i fatti

Monda si n'hani da rida d'avè traduttu a parola francesa « le braconnage » incù a parola : « a bracunera ».


Ci spiega u dizziunariu francesu u sensu genericu di u verbu « braconner » : « Chasser ou pêcher sans permis, ou en temps et lieu prohibés, ou avec des engins défendus », parola chì veni da l'allimanu « brakko » (braccu = ghjacaru di caccia). A spiigazioni hè bedda chjara, tutti i situazioni sò stati ammintati.



In fatti, quandu si circa una parola par traducia « braconnage » o « braconner » in lingua corsa, ugnunu dici a soia. Ma parola sputica ùn si ni cunnosci. Ancu i dizziunarii, corsu/ francesu U Muntese è quiddu di i Culioli ùn hani pussutu truvalla. Dicini : « cacciaghjà in froda, senza parmissu ». In più a spiigazioni ùn hè mancu cumpletta. A banca di a lingua corsa di l'ADECEC rispondi chì a parola ùn esisti micca.U dizziunariu corsu/francesu di Mathieu Ceccaldi ùn ni parla micca. Comu sarà ? À spissu si senti altri risposti : vatà, abrattà, allaccià, lampizà… Sti paroli dani una indicazioni pricisa di una manera difesa di caccighjà. Ma manc'una ùn arrispondi à a parola generica « braconnage » chì parla di tutti i maneri difesi di caccighjà.

Sarà par via chì ùn ci hè mai stata, in corsica, sta manera difesa di caccighjà ? Difficiuli à creda. A vatera di notti hà sempri asistutu ; a caccia for' di chjuditura hè sempri stata praticata ; u passaghju di u biccazzu, a sera, à l'abrucata hè statu, è ferma sempri anc'oghji,  un mumentu aspittatu da monda cacciadori ; tenda i cuppona pà i parnici ùn hè micca un invinzioni muderna ; lampizà a notti par tirà i biccazzi è ancu i signari esisti da poi ch'iddi hani invintatu i pili « Mazda » , « Wonder », « Energizer » … ; tenda i tindini o i lacci pà i meruli era una passioni tamant'è u mondu ; incruchjà i lacci pà i signari ùn l'hani micca invintata oghji ; lintà i cacciamossi pà a sittimana santa era una tradizioni bedda rispittata… Ùn sò micca solu i ditti chì a cunfirmighjani, ci sò ancu i scritti. Quantu prucessi sò stati fatti da i guardii o da i giandarmi pocu fà, cent'anni fà è ancu più nanzi ! Lighjiti i libri « Stampa nostra » è ni truvareti qualchiadunu.


Alora com'hè chì a parola ùn aghi asistutu, mentri chì l'attività hè sempri stata cunnisciuta è praticata senza risparmiu nè paura ? Pò dassi par via chì st'attività da più à menu difesa hè sempri stata accittata da tuttu u mondu, da tutti i cacciadori è ancu da u populu, chì truvava sta manera di caccighjà nurmali, in armunia incù u locu, u salvaticumu, u mumentu è a filusuffia di una cumunità chì campava monda appughjendusi annant'à u so locu è annant'à à u so fruttu, ch'iddu sighi quiddu di a pruduzzioni di a tarra, ma ancu di i so animali, manzi o salvatichi. U salvaticumu facia parti di stu fruttu arrigalatu da a natura. A cumunità di nanzi era monda più paisana. A pupulazioni era più numarosa in i paesi chè in i cità. Ugni famidda avia u so pezzu d'ortu o addivava qualchì animali (purceddu, ghjaddini, vacchi, capri, pecuri…). Campavani in un sistemu d'auturchia, induva si pruduciva ciò chì era indispinsevuli à a vita. È quandu ùn s'avia micca tuttu si scambiava incù u vicinu o incù d'altri rigioni a robba : farina castagnina contr'à  sali, fasgioli contr'à carri…A ghjenti di fora, « u frusteru » ci ghjunghjia pocu. Mirà i so animali, vardà a so robba è i so chjosa, i so orta, difenda u so fruttu (castagni, piri, meli, noci, uva, fighi, amanduli...) era un affari naturali è ligali. A caccia accumpagnava tutti st'attività. Era cumplimintaria è sustiniva a difesa di u rughjonu. Alora à chì bonu dà un nomu à ciò chì ùn asistiva micca, à ciò chì ùn era micca un cattivu fattu, à qualcosa chi si chjamava simpliciamenti « caccighjà ». A caccia era di monda maneri, tutti urdinarii, nurmali in a sucietà à quiddu mumentu. O di ghjornu o di notti, o incù u fucili o incù altri mezi, o d'istati, o di branu, o di vaghjimu, o d'inguernu, era sempri tempu di pidassi qualcosa da manghjà in suprapiù. Ma a diminzioni di sta caccia era diffarenti di quidda d'oghji. L'attività era arrughjunata par via di u dispiazzamentu difficiuli (micca vitturi, pocu stradi…), pocu fucili è pocu cartucci. Era ghjustificata da a  difesa di u locu è di i piantazioni particulari (orti, finaghji, luzirnaghji, biaddaghji, castagneti…). Era ancu ammaistrata da una certa cunniscenza di u locu è di u salvaticumu. Si visticava bè nanzi di vatà un signari. Si sciddiva in funzioni di a vistichera (varu o lofia, purchettu o annincu…). In quissa era una caccia selettiva. Ùn si tumbava micca à cianfru, senza veda è senza cuntà. I limiti esistivani tra a ghjenti è i cacciadori, ancu s'iddi ùn erami scritti.


In cunclusioni si pò guasgi dì chì tempi fà, sti maneri difesi di caccighjà, ùn raprisintavani micca nè pà i cacciadori, nè pà a pupulazioni, un attu  cundannevuli. Erani usi è attività naturali chì si truvavani in cuntradizioni incù a regula francesa, raprisintata da l'amministrazioni. Ci era una spezia di rumpitura è pocu capiscitura tra a pupulazioni, i cacciadori è i raprisintanti di u statu. A leggi paria essa inadattata, for' di locu è di mumentu à pettu à a realità di a vita ughjinca di u populu.  Ùn era tantu ben vistu u guardia o u giandarmu chì avia arristatu un vechju vatendu un signari. Nè mancu quiddu chì prucissava un ghjovanu piddendusi qualchì merula incù i lacci o i tindini. Era un affrontu di mandalli davanti à a ghjustizia par un fattu o un bisognu ghjustu.



Ma alora sti cumpurtamenti hani aruvinatu a caccia ditta ligali? Mittivani u bisbigliu tra i cacciadori ?


Manc'appena o pocu è micca. I bisbigli hani sempri asistutu, ma ùn erani micca i stessi chè quiddi d'oghji. I cacciadori di prima aviani guasgi sempri un duppiu statutu. O erani cacciadori furistini, o cacciadori pastori, o cacciadori agricultori, o cacciadori sbuscaghjoli, o cacciadori campagnoli… Tutti aviani un rapportu incù a natura è incù i so attività. Monda cacciadori d'oghji ùn hani più stu statutu. A maiò parti hani un statutu di cacciadori citadini.

In fatti ùn esistiva micca sta spiccanza tra u cacciadori « ligali » è l'altru menu rispituosu di tutti i reguli. Da più à menu tutti i cacciadori (erani menu numarosi innanzi), praticavani tutti sti maneri di caccighjà chì participavani à l'arti di a caccia. U tiru solu ùn era chè una parti minuredda. In cunsiquenza ùn ci pudiva essa tanti litichi par stu fattu naturali. Tutti sti formi di caccia ripunivani annant'à a vistichera. Si pugnava di piddà u salvaticumu sceltu. In quissa ci era una vera selezzioni è ancu una spezia di gestioni uriginali di a caccia. Di regula si piddava  u suprapiù, l'animali maiori, u varu...

Ma tuttu ùn hè micca andatu di bè, ancu s'iddi facivani attinzioni à ùn sfassi di u salvaticumu. A prova si n'hè. U cervu hè sparitu da Corsica dopu à a guerra di u quaranta. A levra s'hè appuculita ed hè ancu sparita in monda rughjona quaranta o cinquant'anni fà. I signari sò numarosi in certi loca, ma scherzi in d'altri… Tuttu issu risultatu ùn veni solu da « a bracunera ». Ci sò di sicuru altri raghjoni, com'è i foca, a manghjera, l'occupazioni di u spaziu, u clima, u diranghjamentu, a prissioni generali di caccia… Ma dinò a caccia supra misura. Ùn ci voli micca à lascià creda chì i nosci vechji t'avivani sempri raghjoni. U for' di misura di a caccia sarà sempri un priculu pà u salvaticumu è pà l'equilibriu di a natura.


                     Oghji, ci hè « bracunà » è « bracunà » :


Si senti à spissu sta sprissioni. Scavendu appena, daretu à st'affirmazioni ci hè una parti di verità. Si cunnosci in ugni locu, veri cacciadori chì « bracunighjani ». In fatti sò ghjenti chì praticani una forma di caccia chì ùn hè micca ricunnisciuta da i statuti francesi. Si ferma suspresi è ammaraviddati di senta cuntà i so fatti è i so tecnichi di caccia. Sò un veru incantu di sapè è di sapè fà. Mi cuntava un cappiaghju i so caccighjati à i meruli incù i cappii. Tamanta cunniscenza di u locu, di a merula è di u turdulu, di a manghjera, di l'incruchjera, di u tempu, di a natura in generali... è tamantu sapè fà : appruntà capu nanzi tutti sti cappii, truvà i violi suttu à i machjoni, marchjendu in culipippuli o à brastaconu, senza mai perda u filu… Un veru arti maiori. Com'è quiddu "trappeur" di u Canadà, o quiddu cacciadori di l'Africa chì si servi di tuttu a so sapienza, a so spirienza è di a so cunniscenza par piddà u salvaticumu. Listessi cumplimenti par quiddu chì suveta u signari, u biccazzu, a levra… pugnendu ad essa più malignu chè iddu... Sò tutti maneri di caccighjà universali chì facini risorta l'addattazioni di l'omu à a natura. Saria bè, à cundizioni d'essa limitata è urganizata, di fà entra in una ligislazioni rigiunali, sti maneri d'altu rispettu di a natura. À spissu sò monda più selettivi chè a caccia incù u fucili. Quandu sò praticati incù mudistia, incù reguli è incù limiti, sarani  da veru atti di « bracunera » ? Ci hè da dumandassi. U tuttu hè di firmà in una presa raghjunevuli di salvaticumu. Hè sempri a stessa filusuffia : « u troppu stroppia ». Inveci, quandu si senti oghji tiri d'artigliaria nant'à i taddi à i culumbuli, tiri di mitragliosa in tutti sti chjosi è issi machji à i meruli è à i turduli, ci hè da spavintà. Ci sò chì si fermani intilati da tamantu fracassu. S'hè ancu intesu, è sarà vera, chì certi cacciadori pagavani ghjurnataghji par accodda è par carrià tutta sta robba in i sacchi. Sarà quissa una caccia rispittuosa ? Parchì tumbà centu o dui centu meruli à parsona tutti i ghjorna? Chì fanni ? È u circondu, a ghjenti, l'animali manzi, qualiss'hè u so rispettu ? Sta manera « ligali » di caccighjà s'assumidda di più à un veru tiru di « ball trap ».  Ùn hè più un attu di caccia. I limiti di u rispettu sò varcati. Hè vera chì sta caccia ùn dumanda tantu sapienza, nè tantu cunniscenza, nè tantu sapè fà. Basta ad impustassi è à cartuccià.  Ùn hè più un affari di bon cacciadori, ma piuttostu di bon tiradori. Listessi affari pà i squadri di signari chì tumbani quattru o cinqui signari in una cacciamossa, a matina. Parchì spicciassi di lintani altri è tumbanni dinò altretantu ? Ùn bastani pà a ghjurnata ? Hè tuttu un affari di misura. Sarà un beddu fattu di mettasi in prima pagina di un ghjurnali, incù u ritrattu di vinti signari tumbi in una ghjurnata ? Pò dassi chì a parola « bracunà » duvaria oghji piddà un'antra strada, è intarissassi à d'altri maneri di caccighjà chì sò ditti « ligali », ma chì arruvinani u locu, u salvaticumu è a caccia in generali.

Alora hè vera. Ci hè « bracunà » è « bracunà ».

A prova si n'hè chì oghji ci hè veramenti bisognu di circà una traduzzioni più larga di a parola « braconnage ». Ci hè bisognu d'essa attenti à a passioni « scema », in u veru senzu di a parola. In fatti « a passioni » hè un sintimu nobili è un arnesi filusofficu di prima trinca par andà più luntanu, par pugnà di fà sempri meddu. Com'idda hà dici Sant'Austinu : « Quiddu chì si perdi in a so passioni perdi monda menu chè quiddu chì perdi a passioni », ùn ci saria più veri cacciadori senza sta passioni. Ma oghji a « bracunera  scema » poni un prublema maiori pà a caccia, pà u salvaticumu è pà i cacciadori chì pugnani d'urganizà è di gestì a caccia appughjendusi annant'à associi di tutta sorti, grupamenti, squadri di caccia, federazioni… Sta parola duventa oghji sinonima di malfattu, di sfaci locu, di mancu di rispettu, di disurganisazioni, d'eguisimu, d'individualisimu, di sbruffa, di cumpetizioni, di prufittera… Stu bisognu di sprima stu bruttu fattu dumanda una parola spicifica. A « bracunera » si sparghji, s'allarga ancu fora di u gruppu « cacciadori ». Quantu ghjenti senza parmissu, senza essa cacciadori, hani imparatu à fà listessi par pidassi anch'iddi qualcosa : levri, biccazzi, parnici, signari… incù lacci, à vatera… Hani imparatu subitu à pasciali par avvizzalli à u locu. È tandu…

Tumbassi solu solu da cinqui à deci signari u mesi tindindu i lacci, vatendu a notti  dopu avelli pasciuti, ghjirandulendu i imbrancamenti incù 4x4 è lampioni chì acecani… ùn hè più un arti di caccighjà ma un veru discempiu. È chì fanni di tanta robba ? Par empiasi u corpu ? Par empiasi a bunetta ? 

Pidassi solu solu da deci à trenta biccazzi lampizendu una santa nuttata in i pirati, a sera di passa, ùn hè più un arti di caccighjà, ma unu sprupositu senza nomu. Supratuttu quandu si cunnosci u prezzu di u biccazzu vindutu. Ùn hè più pà u solu piaceri ch'iddu si faci tamanti disguasti...


                               U soldu, u cumerciu…

A « bracunera » hè dinò sustinuta da un marcatu chì ùn esistiva micca tempi fà. Oghji si vendi di tuttu : meruli, turduli, biccazzi, culumbuli, signari… è à prezzu bonbon! Ci hè da spavintà. Tuttu quissa senza alcuna auturisazioni, senza  cuntrollu, nè sanitariu nè finanziariu. Un veru marcatu neru di i tempi muderni. I risturanti ùn si piattani mancu, scrivindu annant'à a so carta, salvaticumu in tempu d'interdizioni. Ci sò qualchì prucessi. Ma si  sò adattati fendu falzi fatturi di carri compra. I federazioni di caccia di Corsica dumandani di più in più dicisioni è atti da a parti di i guardia caccia, di i ghjudici, di i servizii veterinarii, di a dugana, di a ghjustizia… di tutti quiddi chì poni intarvena in u ciculu di a caccia, di a vendita è di a cumercialisazioni. L'associi di caccia è i cacciadori dinunciani st'abusi, ma lampani à spissu a colpa annant'à cacciadori « stranieri » o « frusteri », quiddi chì ùn sò micca di a cumuna o di u rughjonu di caccia. Sminticani monda d'apra l'ochja è di veda chì u varmu hè drintu. Hè ancu quissa una manera di scantà u prublema, di purtallu altrò, è di lascià curra. Par certi si cundanna, par d'altri si trova una scusa… una manera di dalli  raghjoni. Hè com'è in tutti i situazioni di a vita. Ci hè sempri un scalinu murali diffarenti di u malfattu sicondu a ghjenti è a so filusuffia.


- À chì pensa chì « bracunà » ùn pesa tantu quandu si metti à pettu à d'altri fatti monda più gravi. È tandu ùn vali à pena à circà a cruna di l'acu à chjar' di luna. 

- À chì pensa ch'idd'hè un fattu impurtanti parchì traduci tutta una filusuffia di pocu primura di a natura, di fà com'idda veni è com'idda si pensa, senza pinsà à l'altri, senza piddà in contu i reguli di a vita in sucietà, senza misura, senza limiti… In quissa purtaria à un disiquilibriu di a vita in cumunu. Saria à prò di l'individualisimu è di l'egoisimu, inveci di sviluppà  l'intaressu  generali di l'omu è di l'animali. 

- À chì voli metta dui pedi in unu scarpu. Scusa tal parsona par tal fattu difesu, ma cundanna quidd'altra frustera pà u stessu fattu, supratuttu quand'iddu si passa in u so locu o annant'à i so pruprietà.



Alora chì pinsà è chì fà oghji di stà realità ?

Lascià fà, lascia curra, parchì ùn hè micca un affari di statu. Sò i cacciadori chì si facini mali tra iddi. Ùn hani chè à sbrugliassi è ad arranghjassi. Di tutta manera quand'ùn ci sarà più nudda, l'affari sarà arrigulatu. Ci sò chì à pensani… Sarà quissa una pusizioni è una riflessioni rispunsevuli di a gistioni di a vita cumuna è di l'equilibriu tra l'omu è a natura, tra l'omu è a caccia ? Pari essa piuttostu un signu di dibulezza, una manera di piattassi, di fà neci di ùn veda nè di senta.

Mandà i giandarmi o i guardia à tutta sta ghjenti  par falla arristà (in i dui sensi di a parola : arristà di « bracunà » è arristà, metta in prighjò)? Ci sò chì à pensani… Sarà quissa una manera rispunsevuli, accittata o nò da a filusuffia corsa, impastata o nò in a cultura è in i tradizioni corsi ? Ùn sarà micca tandu una perdita di a noscia scala di i valori ? Disgraziatu quiddu chì palesa, chì vendi u so vicinu ! In Corsica esisti sempri, com'è ind' a bibbia, sta filusuffia è stu mendu di cundannà u fattu ma micca a parsona chì l'hà fattu (« Si dici u piccatu, ma micca u piccadori ») dici u pruverbiu. Quì ci truvemu davanti à un prublema di rispunsabilità cullettiva. Ùn tocca micca à l'individu di rigulà u prublema, ma à a cullettività, à quiddi chì tenani a leva di a dicisioni è di a ghjustizia. Ma quissa pinsata ùn iscanta micca a rispunsabilità individuali chì parmetti ad ugnunu di participà à una riflissioni è à un cumpurtamentu equilibrati è tinuti da un certu sennu.

Sti dui pusizioni stremi ci lasciani sempri annant'à u dubitu. Chì fà, comu fà ?

Dinuncià u fattu supra  locu, in a so arghja di vita, dinunciallu à altu niveddu hè un cumpurtamentu mondu spartu è cunnisciutu. Si senti dapartuttu lagni annant'à tutti issi vituperii.  Venani da i cacciadori stessi è ancu da l'aghjenti di i paesi, da quiddi chì t'hani animali... Falla sapè! Ci sò monda chi a pensani. Eppuri ci hè quantunqua una certa riserva è un certu frenu in sta cumunicazioni. Si faci a diffarenza tra ciò chì hè supurtevuli, accitevuli è ciò chì svolta u stomacu. Piddassi un biccazzu o dui a sera à l'abbrucata, tumbassi un signari o dui in l'annata, vatendulu vicinu à a so casa, à u so ortu o à a so vigna, allacciassi qualchì merula incù i tindini, lintà una cacciamossa par a sittimana santa… sò tutti caccighjati difesi ma da più à menu accittati. Ùn raprisentani micca, in u parè generali, un malfattu veramenti dannosu. Ma tumbà senza cuntà, senza arrestu, tuttu l'annu, di ghjornu è di notti, par empia i cunghjilatori o par fanni solda, quissa po nò. Sò fatti troppu dannosi. A dici u pruverbiu : « u troppu stroppia ». Quandu si varca a misura, a ghjenti ùn la pò più accittà. Si scopri quì una duppia balancia di u pesu di a « bracunera ». Una balancia lebbia par pisà i fatti pochi dannosi è un pisonu par sullivà quiddi sprupusitati. Sò i balancii di u populu, diffarenti in a so manera di pisà l'impurtanza di i fatti. A balancia ufficiali, quidda di « a ghjustizia », ùn hà ancu trovu i veri pesi « ghjusti » par cundannà o nò tutti sti fatti. Ancu quì abbisugnaria ad addattà a leggi incù a realità di a pinsata, di a filusuffia, di a cridenza, di a scala di i valori di un populu. Pò dassi chì i pesi ùn sariani micca listessi quì chè in altrò. Ci sò chì sariani scandalizati di senta sti riflissioni. Ùn sariami alora più uguali davanti à a leggi francesa ? Una sola leggi par tutti ! S'idda fussi vera ? Ùn ci hè chè da veda i cundanni ! Ma qual'hè chì pò cirtificà chì u stessu fattu t'hà a stessa impurtanza è u stessu valori in Corsica è in altrò? Supratuttu quandu si tratta di caccia !

Si dici à spissu : « L'usu faci leggi. »  A ghjustizia ùn hè micca listessa sicondu u mumentu, i circustanzi, i ghjudici, u locu, u paesu… U so impiegu strettu senza tena contu d'altri fatti pò purtà à l'inghjustu. L'usi è i maneri di fà di un paesu intriciani lei è reguli cumuni accittati da a cumunità. A so custruzzioni si faci annant'à u sennu, a saviezza è annant'à u sapè, a pratica è i cridenzi di u populu. Raprisentani una spezia di tavula di i leggi è di i rigulamenti nati da tutti sti fatti. Sò diffarenti di i leggi ufficiali à spissu senza anima, senza fiatu è luntanu da i rialità lucali, da u fattu ch'iddi piddani in contu è ripruduciani tutta a diminsioni umana è spirituali di un populu. Esisti ancu in Italia : «  L'usu viecchiu è legge. » (Calabria) ; in Spagna: «  La costumbre hace ley. »; in Francia : « Usage fait loi. »; «  Plaisante justice, qu'une rivière borne ! Vérité au-deçà des Pyrénées, erreur au-delà. » (Pascal) ; « Vérité hier, erreur aujourd'hui, faute demain. » (Montaigne) ; è in altri paesi : «  Peccadilles dans mon pays, grands péchés à l'étranger. » (Magyar), « Un renard ne devrait pas être jugé au procès d'une oie. » (Inglesu), « Stricte justice, grande injustice. » (Allimanu) 


          In circa di cunclusioni

Ci sarà o nò una suluzioni par appaccià a caccia. Attenti à ùn cascà micca in un affrontu tra cacciadori,  tra cacciadori è ghjenti di u locu, tra cacciadori è agricultori. Metta pettu à pettu quiddu chì si dici  « drittu » è quiddu chì si dici « tortu » hè un priculu pà a caccia ma ancu pà a vita suciali. Ùn si tratta micca di dà lizzioni di murali. Si pugnarà di discuta è di servasi di u so ciarbeddu par piddà una strada raghjunevuli. Ùn hè micca tirendu cartucciati annant'à i ditti « braconniers » ch'iddu si truvarà à isciuta. Sarà pò dassi quandu ugnunu avarà capitu u sensu di a gistioni è di u rispettu di a ghjenti, di u locu, di l'animali è di u salvaticumu. È par quissa ci vularà di sicuru à cummunicà, à spiigà, à fà capiscia, à metta tutti i cacciadori davanti à a realità, di falli pianu pianu ammaistrà a so passioni, di trasfurmà una passioni « scema » in una passioni muderata, in un piaceri simpliciu. Ci vularà dinò à fà a diffarenza tra a caccia piaceri simpliciu è a caccia cumpetizioni. Quandu si circa à fà sempri di più è ancu à fà di più chè l'altri, tandu duventa una vera cumpetizioni. In quissa a caccia ùn pò essa un « sport » incù a cumpetizioni par mutivu principali. Innò, a caccia ùn devi essa quissa. Duvaria essa solu un piaceri. In prima ci vularà à raghjunà tutti sti ghjovani chì principiani à caccighjà, è po ci vularà à ripeta, senza mai piantà i pussibilità è i difficultà di a caccia. Fà calà a prissioni di caccia in generali, ch'idda sighi parmissa o nò, supratuttu in i loca induva veni à mancà u salvaticumu, incalcà di bedda manera, ma ancu incù a riprissioni, annant'à quiddi chì ùn la volini capiscia, intarvena siveramenti annant'à a vendita di u salvaticumu, armunizà tutti i mezi d'intirvinzioni è di surviglianza di a caccia, dumandà à u statu addattazioni di u codici rurali, di a leggi, in u quatru di l'esperimentazioni ligislativa, addattazioni chì pudariani purtà nant'à i dati d'apartura è di chjuditura, nant'à  a gistioni di u cumunu… ma dinò annant'à i maneri di caccighjà in Corsica incù i so limiti, in regula generali nant'à una vera rigiunalisazioni di a gistioni di a caccia. Saria bè chì l'associi è i federazioni riflittissini nant'à stu prughjettu di piddà in contu i realità lucali è di falli entra in a leggi, prupininduli à a cullettività tarrituriali… Si capisci chì l'affari ùn hè micca simpliciu. « Incù a pacienza s'acquista u paradisu » dici u pruverbiu. Ma ùn ci voli mancu à stà a bucca aparta aspittendu chì i lonzi caschini da u celi. Ùn basta micca à dì chì a casa di l'altru hè brutta. Ci voli supratuttu à spazzà davanti à u so zuddu. A « bracunera » hè dunqua un prublema chì cuncerna tutti i cacciadori è tutta a pupulazioni. In quissa saria bè di truvà a parola chì currispondi à u malfattu ch'idda raprisenta oghji. Parchì à un certu niveddu « bracunà » un hè più sinonimu di « caccighjà » ma piuttostu di « scaccighjà ». Ma saria bè dinò di circà di principià una riflissioni annant'à stu fattu, à tutti i niveddi di a gistioni di a caccia, à principià, o da insù (federazioni), o da inghjò (squadri di caccia è cacciadori soli), pugnendu d'assucià quiddi chì sò primurosi di mantena sti pratichi di caccia difesi oghji, è chì sò à tortu, scantati da a riflissioni. Ma ci vularani strutturi d'urganisazioni è d'armunisazioni è monda capacità d'ascultera è di cumunicazioni. 



                                                                                     Arnestu Papi