Fédération Departementale des Chasseurs de la Corse du Sud

A CACCIA E A LINGUA


A PARNICI  

 

1 - CUNNISCENZA DI A PARNICI  

 

«  Pani è parnici, affari di casa ùn si ni dici. » Tuttu quissu par dì chì ùn si devi micca dì i so affari incù tuttu u mondu. Ma ci hè u pani è a parnici. Dui cosi impurtanti o sarà solu pà fà a rima? U pani hè u stentu, ciò chì si sparti in famidda. È a parnici? Sarà parch' idda hè un aceddu salvaticu chì campa à spissu vicinu à a casa, à u paesu? Farà parti di a casa, di u campà di a famidda? In fatti, a parnici hè monda caccighjata è cunnisciuta da longu andà. È ancu più in ghjiru à i loca manzi induva ci hè da manghjà: frutta manza o salvatica, biadaghji, granacedda di pianti salvatichi... Accadi di pisalli à qualchì passu da a casa. Si pò dì ch'idd'hè un aceddu mezu casanu. Ma ùn hè micca un aceddu manzu. Teni monda à a so libartà, ancu u pruverbiu chì suveta a dici : « Aschesi è pernici ùn si ponu ammansà. » 

 

Quantu ciormi chì avvinghjani, à a piduta. Ma micca à l'inciartu. A parnici teni u so locu. Hè un aceddu arrughjunatu. Movi a mani à bon'ora, à a pisata di u soli. « Camina pedutu pedutu cum'è a pernice. »U coppiu di i maiori accoddi tutti i so piulacona, chjamenduli d'un brionu cunniscitivu: caccianighja in a costa induva si sò accolti par dorma. Si senti, à l'aghjurnata, u chjama è rispondi di i chjuchi è di i maiò. I ciaccianumi s'avvicinani unu da l'altru sin'à chì a ciorma sighi addunita. Tandu cheta. Issu fattu di chjamassi si ripeti ad ugni volta ch'iddu ci hè u sparruciumu par via di u priculu: cacciadori, vulpi, falcu, ghjattivulpi... Una volta mossi, u primu affari à fà hè di circà u puzzu d'acqua par bia, supratuttu d'istatina. U puzzu o l'ochju d'acqua hè par iddi un locu priculosu. Hè a posta scelta da u cacciadori, chjamatu piuttostu u pridatori o ancu u « sfaciloca », chì hè mal vistu di tirà a parnici in tarra o quand'idda bii.

 

Di regula, in a ghjurnata, avvinghji i piani, in circa da manghjuscula. Li piaci monda à ruspà a tarra, circhendu ova di furmiculi. Si trova quinci è culandi fussicedda cunniscitivi. Hè un aceddu chì stà vulinteri in i loca asciuti, un pocu pitricaghjosi o ancu in i cantunicci. Si poni truvà in piaghja, in muntagna, in a machja ... un pocu dapartuttu in Corsica. Hè monda sparta.

 

In sirintina, quandu u soli si ciotta, a ciorma si ni volta à u so ghjacitoghju. Pà u più u si faci in a costa. Ghjacini tutti accolti. À senta dì i cacciadori, a sera, nanzi di ponasi à ghjacia, dopu avè pidiatu tutta a ghjurnata, a ciorma spicca un picculu volu, l'ultimu, quiddu chì farà perda a so vistighja à i pridatori. In casu di priculu, si lampani à a spicera in u bruttu, induva ci hè a machja feltra (l'arrestu), sia à a piduta, sia spicchendu volu.

 

Toccu à a fini di dicembri a ciorma si sfaci. U masciu s'accoppia incù a femina. Sò cunnisciuti unu da l'altru da u fattu chì u masciu t'hà un spinzonu, un spronu à i peda. A femina ùn hà micca. Tutt'è dui s'arrughjunighjani in un locu induva ci hè tranquillità, da bia è da manghjà.

 

« Perchè pienghji tù culomba per avè persu duie ove, lascia pienghje la parnice chì n'hà persu dicenove. » U coppiu faci u so nidu. Da fin' di marzu à mezu d'aprili a femina cova da 10 à 20 ova. U masciu teni a guardia. Vinti quattru  ghjorna dopu nascini i piulacona. Si ùn si lascia vinighju à a parnici, si pò lascià a so cova. Ni facini una sola par annu. À tempu nati, i parnociotti suvetani u coppiu è stani uniti sin'à a fini di l'annu. Di regula, ci hè sempri più masci chè femini. Ci hè dunqua cuncurenza è baruffa tra i masci par accuppiassi (si pò cuntà 3 masci pà 2 femini). Quandu si vidi ciormi di 5 o 6 dopu à u mesi di ghjinnaghju (mesi di l'accuppiera) si pò pinsà ch'iddi sò tutti masci.

 

Com'è a parnici hè un aceddu arrughjunatu, si poni truvà sempri à i listessi loca. Accettani mal' vulinteri chì un antra ciorma accupessi u stessu rughjonu. O a scaccighjighjani o si ni vani. Par quissa, u fattu di lintà parnici ghjunghjitici poni un prublema d'occupazioni di u spaziu, senza cuntà quiddu di a malatia. Ancu s'iddi sò vaccinati poni essa purtadori di malatia.

 

Ind'è no campa a parnici russa. Esistini in altrò a parnici grisgia, appena più chjuca, a parnici "chucar" in America, a parnici "gambra" o parnici di cantona in Africa di u nordu, a parnici "bartavelle" è a parnici "rochassière" in muntagna.

 

2 - A CACCIA À A PARNICI  

 

Tempi fà, quandu i fucili è i cartucci erani schersi, si caccighjava a parnici di dui maneri: incù i cappioni è incù u cuponu.

 

I cappioni o i cappii erani fatti incù i pili di a coda di u cavaddu. Si facia un nodu strangulatoghju (scuritoghju, scursoghju) è si tindia in i passaghja maestri. Si stringhjiva u passaghju com'è un imbutu incù fraschi è brancona par avvià a ciorma in u cappiu.

 

U cuponu era fattu incù una bedda teghja. Si carabunava appena è si puntiddava a teghja supra à u carabonu incù un incrochju di legnu (rochju). Si lampava da manghjà (biada, orzu..) vicinu à u rochju chì scruchjava a teghja. I parnici si firmavani cupunati suttu. À volta si piddavani vivi vivi. In altri loca u cuponu hè una reta chì sirvia à piddà i parnici di notti quand'iddi sò inciuciuliti una contra à l'altra. Issi maneri di caccighjà sò sempri stati diffesi è sò priculosi pà a mantinera di a razza. Si ni pidda troppu ad ugni volta.

 

Oghji a manera hà cambiatu. U fucili, i cartucci è u ghjacaru sò i trè armi di u cacciadori di parnici. Un bon ghjacaru chì hà una bedda circa è una bedda ferma farani u so piaceri. Ma induva circà a parnici? U cacciadori praticu cunnosci i so loca è sà ch'idda batti sempri u stessu rughjonu à a listessa ora. Di matinata, s'iddu movi à bon' ora, pò avè a scianza di sentali caccianà in a costa. Tandu li tuccarà à pugnà di taddà a vistighja par metta u so ghjacru annantu. U so nasu farà u restu è purtarà u cacciadori versu a ciorma. Quandu idda ùn hè micca troppu spavichjata tinarà a ferma di u ghjacaru. Incù un pocu di scianza si pisarani spiccati, à chì nanzi, à chì apressu, pà u piacè di u cacciadori. Si a ciorma hè numarosa pudarà suvità  d'ochja dui o trè parnici pà pricisà i so calatoghja. A parnici ùn vola micca miraculi. Hà sempri u pinseri d'accoddasi u più prestu pussibili. U cacciadori pudarà fà dui o trè rimissi s'iddu li dà tempu di rifà un pocu di vistighja pà u ghjacaru. Sarà più dura tandu di pisalli. A parnici, impaurita, s'hè lampata in u forti (l'arrestu), in un locu bruttu incù a machja feltra. Meddu saria à caccighjalli in dui. Unu suveta u ghjacaru par fallu travaddà è l'altru pugna ad avvirsassi par pudè sparà, senza mai taddà u scapizzu à u ghjacaru.

 

Quandu l'ora di a matina hè avanzata hè meddu à circalli à parta da u biitoghju, quandu a parnici hè dighjà andata à bia. Si pugna à taddà a vistighja in ghjiru, dendu più scianzi à u ghjacaru di cascà à nantu.

 

A sera, un pocu à tardi, si faci listessi, ma circhendu a strada di i ghjacitoghja. Una volta trovu a vistighja tocca à u ghjacaru di fà u restu. Basta ch'iddu ùn la pidessi micca à u traversu. Tandu hè quantu à « circà a cruna à chjar' di luna ».

 

Di regula si tira a parnici à volu. Ma ci sò chì l'aspettani à i ghjacitoghja o à i biitoghja pà tiralli in tarra. Quissi sò mal' visti da i cacciadori di parnici. A vera caccia hè monda spurtiva. Ci voli à fà u codd'è fala tutta a ghjurnata. Un cacciadori rispittuosu ùn tocca più una ciorma quand'iddu ùn ferma chè quattru o cinqui parnici. Una ciorma sfatta hè a ruina di a caccia.

 

 

Arnestu Papi