Fédération Departementale des Chasseurs de la Corse du Sud

U BICCAZZU



U BICCAZZU


1- CUNNISCENZA DI U BICCAZZU 

 U biccazzu hè un aceddu ghjunghjiticiu, di passaghju ind'è no. Ghjunghji da i paesi di u nordu mezu uttrovi è si ni và di frivaghju. Ùn ci stà micca tuttu l'inguernu. Una grossa parti  s'arresta un mumentu è po si ni và versu i paesi più dulci, quandu a tarra cotra troppu. S'arrughjinighja in i loca trosci, moddi, induva ci hè da manghjà è induva pò viaghjà senza troppu difficultà. L'arba alta li piaci pocu è micca. Ci sò i loca da biccazzu. Sò quì è micca culà! Teni à pocu affari. Tutti l'anni si trovani à u listessu locu. È quandu si ni tumba unu, ni volta un antru à a so piazza. I so cacati, cunniscitivi, tradiscini a so prisenza. Tutta a ghjurnata si ni stà in u bruttu. Pidiighja quinci è culandi in circa di varmi, mignoculi, insetti, bizzichendu in a tarra troscia, umula, par circà a so manghjuscula. Rientri u lindumani nanzi à l'aghjurnata in u so locu sicuru, suttu à i scuppona, in alzicci in
una bedda filicaghja.                                                                                                    
U biccazzu t'hà dui armi pà a so difesa: u culori di i piumi si marita incù a natura è a vista. I so ochja, piantati un pocu daretu à u capu, li parmettani di veda da davanti  com'è da daretu. Hè un aceddu dillicatu. Si pò tirà incù u piumbu  finu  (baddini di 8 o di 10). A so carri t'hà una bedda numata. Ci hè da liccassi i dita!
À senta i cacciadori, a passa di u biccazzu, voli dì u mumentu induva ci n'hè monda, hè supratuttu à luna piena. A notti si lampa in i pirati è viaghja monda. Si trovani à spisu dui par dui (pò dassi u masciu è a femina). U masciu saria cunniscitivu à i piumi più chjari suttu à a coda.
Quand'iddu piovi monda si ni stà in u bruttu ghjornu è notti. Trova da manghjà in a machja. Quand'iddu cotra si lampa in i vadinali, in i loca cuparti da l'arburatura. Esci in i piani trè o quattru ghjorna nanzi à a luna piena sin'à trè ghjorna dopu. Infatti quandu a luna pendi, ch'idda hè tardiva, si marita incù u soli a matina, u biccazzu ùn esci più. T'hà a paura di cunfunda u ghjornu incù a notti. Avvinghji da un bruttu à l'altru, sempri in circa di manghjuscula.
Quandu u biccazzu si pesa, fendu monda trostu, i so ali battini prestu prestu. Faci uni pochi di vischi, vola 100 o 200 metra è si cala, dopu à una bedda rimpianata, in u bruttu.
I primi biccazzi à ghjunghja si lampani in muntagna. Impiaghjani dopu à i ghjilatini di dicembri è di ghjinnaghju. U biccazzu hè un aceddu ricircatu da u cacciadori di piuma. Teni bè a ferma davanti à u ghjacaru è si trova sempri à i listessi loca. U cacciadori
praticu si campa quand'idd'hè passa di biccazzu.                                                           

                                          2- A CACCIA À U BICCAZZU

Ci hè monda maneri di caccighjà u biccazzu. I maneri difesi, i maneri difesi da più à menu ricunnisciuti è i maneri auturizati da a leggi. Ùn si pò micca dì, ind'è no, ch'iddu ci hè un' epica di caccia chjusa à u biccazzu. Di fatti ghjunghji è parti in tempu di caccia aparta. Hè iddu stessu chI faci l'apartura è a chjuditura.

I MANERI DIFESI: a caccia di notti incù a lampa.

Li piaci monda a magania à i corsi, à tal puntu ch'iddi ani chjamatu sta caccia : « a caccia incù u braccu « Mazda ».
Quiddu chì hè praticu è chì nuttambulighja sà chì ci sò i passi di biccazzi supratuttu à luna piena, da trè o quattru ghjorna nanzi à trè o quattru dopu. Tandu i biccazzi escini vulinteri in i pirati, in i loca puliti è trosci par piantà u so longu bizzicu in tarra. Tandu hè faciuli à piddalli. Basta ad avè una bedda lampa, un bon fucili è d'avvinghja i pirati, lampizendu quinci è culandi. U biccazzu ferma stantaratu quandu a lampa l'aceca. I so ochja lucicani com'è luciuledda. I "spicialisti" di issa caccia ni piddani da 10 à 20 in una nuttata, quand'iddu ùn hè ancu di più. À chì dici ch'idd'hè par fà piacè à qualchì amicu o à un malatu... À chì par fassi piacè una sola volta. À chì ùn dici nudda ma và à vendali à prezzu d'oru, supratuttu pà i festi di Natali. À chì vendi, à chì compra è à chì empii i cunghjilatori. Sarà quissa a ruina di a caccia? U cacciadori incù u so "braccu" ùn pò pata issa manera di sfà u salvaticumu, qualsiasi a raghjoni.

I MANERI DIFESI DA PIÙ À MENU RICUNNISCIUTI È PRATICATI :


Una di issi maneri hè praticata a sera, à l'abbrucata quandu u biccazzu esci da u brutu par andà à lampassi in un piratu. Com'idd'hè un aceddu arrughjunatu teni sempri i stessi passaghja. Ci sò i passaghja di bedda numata. In u mentri di 5 minuti, sempri à a stess'ora, ni pò passà 5 o 10, metru più metru menu, à u listessu locu. U cacciadori s'imposta à tempu è à locu, è aspetta u mumentu pricisu. Ci voli ad essa monda attenti è lestu par sparà. À l'abbrucata ùn si pò veda chè quandu si stacca in celi. Hè difficiuli à spianallu è à truvallu una volta lampatu. Senza ghjacaru d'aportu hè meddu à pusà. Hè quantu à circà a cruna di l'acu à chjar' di luna.
Un' antra manera, sempri difesa, hè d'aspittallu in un piratu, beddu piattu suttu à un machjonu. U biccazzu t'hà una vista terribuli. Dopu avè visticatu i so cacati o i so bizzicati in u piratu umidu ùn ferma più chè ad aspittà l'ora di l'abbrucata, prima chì u bughju di u celi s'appiccichessi à quiddu di a tarra. Ci voli ad essa pratichi è ad avè una bona vista. Una volta calatusi in tarra hè difficiuli à sceddalu. Bisogna à suvitallu d'ochja quand'iddu ghjunghji. Si tira in tarra.
Issi dui maneri di caccighjà sò da più à menu praticati è accittati. Ùn parmettani micca di piddanni i miraculi. Facini parti di una gestioni muderata di u salvaticumu è intrattenani una tradizioni monda sparta in Corsica chì ùn faci micca disguasti in u salvaticumu.

I MANERI AUTURIZATI :

A caccia di ghjornu incù u ghjacaru d'arrestu o senza hè a sola auturizata da a leggi. Caccighjà u biccazzu senza ghjacaru hè quantu à circà à mocu in a farina. U biccazzu si pesa quand'iddu si ghjunghji in coddu. Ma com'iddu si ni stà piuttostu in i loca brutti, veni mali à u cacciadori à entraci. Incù un bon ghjacaru, micca troppu fucosu, chì teni bè a ferma, sarà faciuli à truvallu, sempri in i stessi loca. Meddu sarà essa in dui. Unu faci travaddà u ghjacaru è l'altru pugna à piazzassi, di manera à pudè tirà à a pisata. Attenti à u colpu d'ala, una spezia di visca chì u biccazzu faci  pocu dopu à a pisata! Hè tandu chì u colpu passa à cantu.
Quand'idd'hè passa issa caccia hè passiunanti, ancu più chè quidda di a parnici. Si poni truvà dui par dui, è ancu uni beddi pochi à nantu à una piccula distesa. U biccazzu ùn vola tantu. Si pò fà a rimissa si u locu a parmetti è si u cacciadori l'hà suvitatu d'ochja dopu à a pisata. Hè una caccia spurtiva, à spissu preferita da u cacciadori di piuma.

U PIACÈ :

Dopu avè presu tamantu piacè à tumbà un biccazzu o dui, veni l'altru piacè, tantu bramatu da u cacciadori, quiddu di manghjà. Tutti quiddi chì l'ani tastu si ni sò liccati i diti. U tuttu hè « di ùn fà micca u biccazzu ». Sprissioni cunnisciuta chì ùn piaci tantu à nimu. 

                                                                                                 Arnestu Papi