Fédération Departementale des Chasseurs de la Corse du Sud

U signari di i trè funtani



U signari di i trè funtani

U SIGNARI DI I TRE FUNTANI






  Era un beddu pezzu chì Cesaru, u capimachja di a noscia squatra di caccia à u signari, avia visticatu fermu in i trè funtani. U locu era bridatu da porchi grossi. U fattu era cunnisciutu:d'uttrovi a castagna casca. Tutti i signari di u rughjonu stavani à arichji tesa a santa ghjurnata pà cuntà quantu ni falava. À l'abrucata ghjunghjivani à trottu sarratu à empiasi u corpu. Troppu tichji, ùn s'alluntanavani tantu pà invaddulassi.

Cesaru a sapia ch'idd'era a so staghjoni in i trè funtani. A dicisioni fù presa di lintà a caccia mossa a matina di bon'ora pà pudè tirà à muntesi in a vadina.


Erami quattru posti ben fasciati chì u locu ùn hè micca una bedda stanza: ùn si vidi mai spuntà u soli. Una currintina ghjilata sculiscia longu à a vadina. Sarà difficiuli à tena in posta più di dui ori, ancu d'uttrovi!


I ghjacaraghjoli è i brioni a sapiani. À tempu in posta a caccia mossa fù lintata. Diu ni libari! In u mentri d'appruntà un pusatoghju asciutu, sparani i colpa di i voci. Tamanta fraiata! Quant’à mè sò cascati à nantu à una vaddulata di signari! Movini i ghjacari à capu inghjò nichjendu à più pudè versu i posti.


Ma com'hè chì "Curticcionu" ùn affachi ancu à i colpa? I ghjacari sò di punta à a posta suprana, quidda chì si trova à fiancu à mè. Com'hè chì Fanfan ùn tirghi? L'avarà presu u ventu?


Auh! Avali capiscu tuttu! Ani pisatu un stripusgiu. Tinti ghjacari! S'ani da fà sannà. Sintindu l'abbaghju furiosu contru à u signari rimissu m'avanzu sin'à posta suprana. Fanfan, attenti,aspetta... Li facciu cennu pà spiigalli chì ghjè movu à tirà a porca rimissa. Fattumi qualchi passu sutt'à l'rbitrona, eccuti chì u mascacciu smarra. In quattru è trè setti mi lampu in a me posta è ...piddalu ghjà!


A banda di i ghjacari varcava dighjà supra à Fanfan...è colpa micca. Dinò unu chì a si sfranca!.. Ma micca pà tantu, chì andaghjini ci n'hè quattru è basta, è sò tutti guardati. Altrò ùn ci si passa, chì i cantona si basgiani unu incù l'altru. Mancu una inziffica pà una vulpi!  Allora induv'hè scattulitu issu signari?


Si sentini, intruvunati, impuzzati, l'abbaghji senza arrichità una stonda. Parini luntanu, chjusi, arristati. U signari s'hè rimissu un'antra volta. Fanfan mi moscia tamanta cantuniccia da induva esci u fracassu. O ghjenti cari! Comu ci hè pussutu ghjunghja u signari in issu locu? A mi dumandu sempri ancu ad avali. Saltendu pà supra à i cantona, mi sogu avvicinatu. L'eru guasgi in coddu è ùn vidiu sempri nudda. Micca pussibili! Induva sò? Affari d'altru mondu: u signari s'era lampatu in una saparedda chjusa. L'acqua, alta un palmu è mezu, schizzava dapartuttu. Pà entra avia saltatu un beddu scaleddu. Erami tutti quì: ghjè à l'intrata, i setti ghjacari arrimbati di culu à u fundu di a sapara, è à mezu, un signaronu chì dava punta à i ghjacari è chì minava à capu calatu. O li tinti ghjacari! À chì piddava, à chì sbulava, à chì ghjanghjulava, à chì si ni stava in daretu dendu curaghju à l'altri...


U bughjiconu di a sapara, u schizzulimu di l'acqua, u fumu di u sudori di i ghjacari è di a porca abbaghjulavani a vista. Tirà, ùn si pò incù i ghjacari di punta. Allora...sò longhi i minuti à veda sannà senza pudè sparà. Ancu fendumi senta u signari ùn mi dava capu. N'avia contru à iddi, chì l'aviani svaddulatu. Pur' chè puri, eccutilu chì si volta versu mè è si stacca da i ghjacari.


À brusgia stupponu, mittinduli i canni à dossu, l'aghju lintatu a fucilata. Hè cascatu in acqua à tempu à u silenziu. Più un abbaghju, più un nichju...Ancu iddi sò fermi stunati.


Ci hè vulsutu aiutu è cordi pà cacciallu da u tafonu. Culombu è Marchisa s'erani fatti sannà ma ghjustu pà supra. Ùn pari mancu vera dopu à tamantu assaltu. Pà issa volta a si sò sfrancata chì u signari avia i sanni tronchi è frusti. Ma attenti à tutti issi stripusgi! Sò iddi chì scannani i ghjacari. 



   Arnestu Papi                                                                              U   28/12/88